Nafarroako Bertso Eskolen eguna, maiatzaren 29an Lesakan

Ikasturte amaierarekin batera etorri ohi da Nafarroako gazteen Bertso Eskolen Eguna. Aurtengoak ere badu data dagoeneko: maiatzaren 29an ospatuko da, Lesakan. Nafarroako Bertso Eskolen sareko 9 eta 16 urte bitarteko ikasleei zuzenduriko jarduera da Bertso Eskolen Eguna.

Goizean mendi ibilaldi bat eginez ekingo diote egunari gazteek. Ondoren, herrian bazkalduko dute eta jolasak egingo dituzte, haien arteko harremanak sustatze aldera. Azkenik, Nafarroako Eskolarteko Bertsolari Txapelketa jokatuko da Lesakan bertan, eta saio gozagarri honek emanen dio amaiera egun osoko egitarauari (aurrerago azalduko dira Eskolarteko Txapelketaren xehetasunak). 

Jarduera guztietan osasun neurriak beteko dira, egitarau dibertigarri bezain segurua izan dadin.

Bertso Eskolen egunean izena emateko hurrengo galdetegia bete beharko da, maiatzaren 14a baino lehenago (galdetegian jaso dira jardueraren inguruko oharrak).

Aisialdia, transmisioaren osagarri

Bertso Eskolen Egunak, Nafarroako Bertsozale Elkarteak antolatzen dituen beste hainbat jarduerak bezalaxe -Negulekuak, topaketak...- Bertso Eskolen sarea osatzen duten gazteen arteko harremana bultzatu eta elkar ezagutza sustatzeko helburua du. Modu horretan, aisialdiari garrantzia berezia eman nahi dio Nafarroako Bertsozale Elkarteak, transmisioko beste bi erpinetan (Hezkuntza Arautuko egitasmoan eta Bertso Eskoletan) egiten den lana osatzeko balio duela ulertuta.

Egun, 18 urtetik beherako 200 ikasle inguru aritzen dira Nafarroako haur eta gazteen Bertso Eskoletan, eskola orduz kanpo bertsolaritza lantzen, 30 taldetan. Horretarako, irakasle sare zabal eta prestua du Nafarroako Bertsozale Elkarteak. Astean behingo maiztasunez, bertsogintzaren oinarriak eta irakaspenak jasotzearekin batera, ahozkotasuna eta gaitasun komunikatiboak garatzen dituzte besteak beste, transmisio bide den giro ludiko batean.