Gazte ugari elkartu da Nafarroako Bertso Negulekuetan

2024/01/09

Abenduaren 27tik 29ra bitarte ospatu ziren, Beintza-Labaienen. Bi eguneko egonaldia izan zuten Nafarroako Bertso Negulekuetan parte hartutako gazteek. Aurtengoan bi taldetan banaturik ibili ziren, 27tik 28ra DBHko ikasleak, eta 28tik 29ra Lehen Hezkuntzakoak. Nafarroako Bertsozale Elkarteak egitarau oparoa antolatu zuen haientzat.

Azken urteetako ohiturari eutsiz, Nafarroako Bertsozale Elkarteak herrialdeko Bertso Eskoletako gazteentzako egonaldia antolatu zuen pasa den abenduak 27tik 29ra bitarte. Ikasmailaren arabera bereiztuak, bi txandatan izan ziren Nafarroako Bertso Negulekuak: DBHko ikasleak abenduaren 27tik 28ra, eta LHkoak 28tik 29ra. Beintza-Labaiengo Orbela aterpetxean ibili ziren, Nafarroako Bertso Eskoletako irakasleak begirale zituztela.

Nafarroa osoko Bertso Eskoletako 55 gazte elkartu ziren bertan, 9 eta 18 urte bitartekoak. LHko 35 eta DBHko 20 gazte izan ziren osotara.

Hainbat izan ziren egitasmoak betetako helburuak. Bertso Eskoletan dabiltzan gazteen arteko harremanak bultzatu eta elkar ezagutzean sakondu zuten, bertsolaritza eskolako logikatik, aisialdi eremura ateraz.

Anitza izan zen aurrera eramandako egitaraua; DBHko ikasleek ezagutza jolas eta dinamikak, txangoak, eta PPP (puntto pala partehartzailea) tailerra izan zituzten, baita bertso-afaria ere, Egoitz Gorosterrazu, Julio Soto eta Alazne Untxalo bertsolariekin. Antzerakoa izan zen LHko ikasleek burututakoa; ezagutza jolas eta dinamikak, txangoa, bingo musikatua eta Bittori Elizalde eta Xabat Illarregirekin prestatutako bertso saioa, hain zuzen ere.

Honako hau izan zen aurrera eramandako egitaraua osorik:

DBHko ikasleen txanda (abenduaren 27tik 28ra)

Abenduak 27

11:30ean, harrera eta gelen banaketa.
12:00etan, ezagutza dinamika eta hamaiketakoa.
12:30etik 16:30era, txangoa eta bazkaria.
16:30etik 18:00etara, denbora librea.
18:00etan, antzerki tailerra.
19:00etan, solasaldia bertsolariekin.
20:00etan, Bertso afaria (Egoitz Gorosterrazu, Julio Soto eta Alazne Untxalo).
22:00etan, denbora librea.
23:00etan, ohera.

Abenduak 28

8:30ean, esnatu eta logela txukundu.
09:00etan, gosaria.
10:00etan, PPP (puntto pala partehartzailea) tailerra.
11:30ean itzulera

Lehen Hezkuntzako ikasleen txanda (abenduaren 28tik 29ra)

Abenduak 28

11:30ean, ongi etorria, hamaiketakoa eta ezagutza jolasak.
12:30ean, txangoa, jolasak eta bazkaria.
16:30etan, Bertso saioaren prestaketa.
18:30ean, Bertso saioa bertsolariekin (Bittori Elizalde eta Xabat Illarregi)
20:30ean, afaria
21:30ean Bertso tribiala

Abenduak 29

09:00etan, gosaria
10:00etan, bingo musikatua
11:30ean, itzulera

2023ko Negulekuak. DBH eta LH-ko hainbat ikasle, Beintza-Labaienen