Bittor Elizagoienek emango du txapela
2013/03/22
Larunbatean jokatuko den Nafarroako Bertsolari Txapelketako finalean kantatuko ez badu ere, Bittor Elizagoien bertsolaria ere protagonista izanen da Anaitasunan. Izan ere, berak jantziko dio txapela Nafarroako txapeldunari. Horrez gain, finalistek Juanan Viedma artistak prestatu dituen oroigarri berezi bana jasoko dute.
Bittor Elizagoien bertsolari baztandarra giltzarria izan da gaur egun Nafarroako bertsolaritzak bizi duen loraldian, besteak beste belaunaldian arteko zubia izan zelako. Bere sorreratik parte-hartze oso aktiboa izan du Nafarroako Bertsozale Elkartean, eta gaur egun ere zuzendaritzako kidea da. Halaber, bertsolaritzaren aldeko langile porrokatua da Elizagoien.
Nafarroako Bertsolari Txapelketarekin harreman estua du Elizagoienek, 1979tik 2011ra edizio guztietan hartu du parte; 17 finaletan egon da eta bitan jantzi du txapela, 1994an eta 1999an. Horrez gain, zientoka saio egin ditu Euskal Herri osoan.
