Urriaren 6an egingo da Bizkaiko Bertso Munduko Emakumeen* II. topaketa
Bizkaiko Bertso Munduko Emakumeen* II. topaketa egingo da urriaren 6an, Bilbon. Orain urte bi egin zen lehenengoa Markina-Xemeinen eta, orduko esperientzia errepikatzeko gogoz antolatu da bigarrena.
Eguneko egitaraua:
- 12:00etan jarri dugu hitzordua Bilboko Errondabide taberna parean. Bilboko alde zaharrean zehar potea girotua egingo da Garazi Navarro Ugarteburu, Irune Basagoiti Agirre, Ixone Asategi Narbaiza eta Maite Sarasola Isazelaia bertsolariekin.
- 14:30rako bertso bazkaria antolatu dugu Kalderapekon. Jone Uria Albizuri eta Nerea Ibarzabal Salegi ariko dira bertsotan. Bazkarirako txartelak salgai daude www.bertsosarrerak.eus atarian, 28 euroren truke. Txartelak erosteko azken eguna irailaren 30a izango da.
Bigarren topaketa honen helburu nagusia bertsoaren inguruan gabiltzan emakumeak batzea eta eguna giro ederrean pasatzea da. Topaketaren talde antolatzaileak urte birik behineko maiztasuna ematea pentsatu du egunari, Elkartearen gainontzeko ekimen nagusien antzera. Urriaren 6ko helburua, beraz, Bizkaian bertsoaren inguruan dabiltzanak elkar ezagutu eta saretzea izango da, izan bertsolariak, bertsozaleak, gai-jartzaileak, epaileak edota antolatzaileak.
Animatu eguna gurekin pasatzera!
Bazkari txartelak hemen salgai.
Zenbat eta parte hartzaileagoa eta anitzagoa, aberatsagoa!
