Bizkaia

Bertsolari Gazteen BBK Sariketa aurkeztu dugu Bilbon

2018/02/26
Bihar hasi eta martxoaren 22ra bitarte jokatuko da Bertsolari Gazteen XXVI. Sariketa.

Goizean aurkeztu dugu Bilbon XXVI. Bertsolari Gazteen BBKSariketa. Bihar izango da lehenengo kanporaketa Igorren, eta martxoaren 22an jokatuko da finala Bilbon.

Sariketa gaur goizean aurkeztu da Bilboko BBK Salan. Bertan egon dira Ione Narbaiza Bizkaiko Bertsozale Elkarteko eragilea, Juanjo Respaldiza Bizkaiko Ikastolen Elkarteko bertsolaritza arduraduna, Onintze Ituño BBKren ordezkaria eta Xabat Galletebeitia bertsolaria, Bizkaiko txapeldunordea. Eurek eman dituzte aurtengo sariketari buruzko xehetasun guztiak.

 

Txapelketaren egitura

Bertsolari Gazteen BBK Sariketea taldekako txapelketa da, eta talde bakoitzean, gutxienez, sei kidek kantatuko dute, bi multzotan:

  • A mailan: 18 urtera arteko hiru bertsolari
  • B mailan: 19 urtetik 25 urtera arteko hiru bertsolari

Aurten ere, azken urteetan moduan sei bertsolariko zortzi taldek hartuko dute parte, eta beraz, 60 bertsolari inguru arituko dira kantuan. Eskualde bakoitzak talde bat osatuko du, hurrengoak izango dira: Arratia, Busturialdea, Durangaldea, Enkarterri/Ezkerraldea, Hego Uribe, Lea-Artibai, Uribe-Butroe, eta Uribe-Kosta.

Bertsolari Gazteen BBK sariketaren ezaugarri nagusienetako bat taldeka jokatzen dela da. Hau da, taldekideen lana talde moduan baloratzen da eta saio bakoitzean puntu gehien batzen dituen taldeak egiten du aurrera.

Kanporaketa bakoitzeko talde irabazlea finalaurrekoetara sailkatzen da, eta finalaurreko bakoitzeko irabazlea finalera.

 

Saioz saio, finalera arte

BBK Sariketak aurreko urteetako egitura berbera edukiko du. Lau kanporaketa jokatuko dira lehenengo, finalaurreko bi gero, eta azkenik, finala. Hurrengoa izango da egutegia:

  • Otsailak 27: 1. Kanporaketa, Igorreko Arratia institutuan, 11:30ean. Arratia-Durangaldea
  • Martxoak 1: 2. Kanporaketa, Zallako Zine antzokian, 10:00etan. Busturialdea-Enkarterri
  • Martxoak 5: 3. Kanporaketa, Deustuko Bidarte kultur gunean, 10:30ean. Hego Uribe-Uribe Butroe
  • Martxoak 6: 4. Kanporaketa, Markina-Xemeingo kultur aretoan, 10:45eran. Lea-Artibai-Uribe Kosta
  • Martxoak 12: 1. Finalaurrekoa, Durangoko Fray Juan de Zumarraga institutuan, 12:00etan. 1. eta 2. kanporaketetako irabazleak.
  • Martxoak 13: 2. Finalaurrekoa, Sopelako Ander Deuna ikastolan, 9:30ean. 3. eta 4. kanporaketetako irabazleak.
  • Martxoak 22: Finala, Bilboko BBK Salan, 19:00etan. 1. eta 2. finalaurrekoetako irabazleak.

 

Entzuleak ere, adin berekoak

Saio gehienak ikastetxeetan egiten dira, eta ikusleak, kasu denetan, ikastetxeetan bertsolaritza lantzen ari diren ikasleak izaten dira. Dena dela, saioak irekiak dira, eta gura duena hurreratu daiteke. Bereziki, finalera etortzeko gonbidapena luzatu dute antolatzaileek. Finala BBK Salan izango da martxoaren 22an.

 

Denentzako saria

Talde izaera indartu eta elkarren arteko harremanak indartu guran, aurten ere,  BBK Sariketako sari nagusia taldeko plan bat izango da. Finalistek garaikurrak jasoko dituzte, baina sari nagusia Txapelketan parte hartuko duten gazte guztientzako (bertsolari, gai-jartzaile eta epaile) egun osoko plana izango da.