Badator Bizkaiko Eskolarteko Txapelketa
Bizkaiko eskolarteko bat-bateko txapelketa hastear dago. Maiatzaren 9an izango da lehenengo kanporaketa Gernika-Lumoko Astra Kulturgunean, 17:00etatik aurrera.
Hiru kanporaketa jokatuko dira:
- Maiatzak 9: Gernika-Lumon, Astra Kulturgunean, 17:00etan
- Maiatzak 16: Bilbon, Euskararen Etxean, 17:00etan
- Maiatzak 18: Durangon, Kurutziaga Ikastolan, 17:00etan
18 urtetik beherako bertsolari bizkaitarrek parte hartu ahal izango dute Bizkaiko Eskolartekoan. Bertsolariek ariketa hauek egin beharko dituzte kanporaketetan:
- Lau oinak emanda bertso bat zortziko txikian
- Berba emanda bertso bat, gehienez, hamarreko handian
- Ofiziotan bina bertso zortziko txikian
Saio bakoitzean parte hartzen duten bertsolarietatik, lauk aurrera egingo dute, eta horiek, ariketa hauek kantatu beharko dituzte saioaren bigarren atalean:
- Ofiziotan zortziko handian bina bertso
- Kartzelako lana: bakarka, gehienez, 10eko handian gai bati erantzunez
Bestetik, idatzizko txapelketa martxan dago Bizkaiko ikastetxe eta eskualdeetan. Hemendik sailkatutako ikasleek idatzizko finalean parte hartzeko aukera izango dute.
FINALA, LARRABETZUN
Kanporaketak jokatu ostean, zortzi bertsolari pasatuko dira finalera. Finala maiatzaren 28an jokatuko da Larrabetzuko eskolan, Bizkaiko Taldekako finalaurrekoekin eta finalarekin batera.
Egitarau zabala egongo da egun horretan:
- 10:00etan: Eskolarteko idatzizko finala
- 11:30ean: Eskolarteko bat-bateko finala
- 14:30ean: Bazkaria
- 16:00etan: Taldekakoaren 1.finalaurrekoa, eskolan
- 17:30ean: Taldekakoaren 2.finalaurrekoa, kalean
- 19:00etan: Taldekakoaren 3.finalaurrekoa, kalean
- 22:00etan: Taldekakoaren finala, Hori Bai gaztetxean
Egun honetan egingo den bazkarirako txartelak www.bertsosarrerak.eus atarian daude salgai, 13€-ren truke.
Aukera begetarianoa gura duenak edota alergiaren bat duenak idatzi bizkaia@bertsozale.eus postara idatzi beharko du.
