Otsailak 7, Agurain

ARABAKO BERTSO KUADRILLA ARTEKOA 2025, AGURAIN 2025/02/07

Aguraingo Latsarri gaztetxean ospatu zuen 4gara taldeak Lautadako Kuadrillarteko Bertso Eguna. Lautadako bertsolariekin batera Ekaitz Samaniego eta Paula Amilburu bertsolari gonbidatuek abestu zuten.

Arratsalde partean eman zitzaion hasiera egitasmoari, izan ere, gaztetxekideak batu eta afaria prestatzeari ekin zioten. Hotzari aurre egiteko menu ederra; txorizo egosia, saiheskia patatekin eta postrerako gazta eta irasagarra. Lanak erdi prest utzita eta elurrak lehenengo malutak botatzearekin batera, bertso eskolako kideak trago baten eske abiatu ziren, bertsolari gonbidatuak noiz helduko zain. Behin egunean jarrita, gaztetxera lekualdatu zen taldea, barrenak ondo betetzeko helburuarekin.

Mahai inguruko saioa izan zen ostiralekoa; gertukoa eta goxoa. Lautadako bertso eskolaren izenean Aitor Najerak, Jon Ruiz de Pinedok, Markel Yollerrek eta Oier Arbinak abestu zuten, beraz, orotara 6 bertsolari egon ziren kantuan.

Bertsolariek egin zituzten lanak anitzak izan ziren: ofizioak, aurrekoak atzekoari eta librean tarteko. Saio ez oso luzea, baina dibertigarria izan zen. Jorraturiko gaiak ere askotarikoak izan ziren; espero ez ziren herentziak, asteroideak, turista bat gaztetxean, Errioxako ardo faltsuak eta gaztetxeko egunerokotasunaren ingurukoak tarteko.

Behin bertso saioa bukatuta, eta partaideak trago bat eskutan zirela, gaztetxeko bi kide barran bertan aritu ziren bertso bat prestatzen, inor konturatu gabe. Bertso hori abestuz eman zitzaion bukaera Kuadrillarteko Lautadako Bertso Egunari.