Otsailak 10, Aramaio 19:30

Aramaioko Ibarrako periferiak eta Arabar Errioxako Txandrio / Aramaioko Tratamendurik gabeak eta Airaldeko Altubepekoak

DOBLETEA ARAMAION, ETA ARAMAIORENTZAT EZER.

Sukaldea atsaldeko zazpiretatik mobilizatuta Aramaioko Zabolako elkartean, bertso eskolakoak barazkiak mozten eta txef ofiziala berandu iristen (berak esango du ez zela berandu iritsi, bere iloba beste pentsaera batekoa da). Gai jartzaileak a juego jantzita, entsaiatu izan balute bezala, baina ez. Aitor eta Martin mikrofonoak entxufatzen, jakingo balute bezala, baina ez. Dena hastear zegoen.

Lehenengo saioa polit joan zen, azkar, Txandrio vs. Ibarrako Periferiak. Etxekoek Txandrioko taldekide bati eskaini zioten agurraren hasiera, arabarra ez zenari, hain zuzen. Ugartek bere kitarra jakinduria atera zuen, baina erritmoa jarrai zezanaren eskean kristo guztia galdu ginen bertan. Eskerrak Igoa jaunak dena moztu eta orden pixka bat jarri zuen taldean. Etxekoen artean izar distiratsuenak gazteenak, Ane eta Iraide, kontuz beraiekin.

Txandriokoek txapelketa honetan asko entzuten ari den kantu batekin egin zuten beraien agurra, Shakirari royaltiak eman nahian edo. Baina errioxatik basea prest ekarri zuten efektu eta guzti, horrela hasi daiteke saio bat! Arabar Errioxara joan zen garaipena lehenengo saio honetan, eta gaua, ardoa bezala, hobetzen joan zen.

Afaria ederra, ez daukagu zertan sartu detaileetan baina barazkipureadeshidratatutakoetaberrrizhidratatutakoonddoetakinoarekinetapikatosteekin eta aldezaurretikmarinatutakooilaskoalimoiarekin oso onak zeuden, galdetu bestela errepikatu zuten guztiei. Hori bai, beharbada ez duguna komentatuko da afarian zehar (eta aurretik, eta ostean) Arabako txapeldunaren ingurura gerturatu ziren zerbeza eta ardo botila guztiak,

Afal ostean hasi zen bigarren saioa Altubepekoak vs. Tratamendurik Gabeak. Aramaiokoek klasikoetara jo zuten Numayei abestiarekin eta Altubepekoek berriz kitarra atera zuten. Aipamen berezi bat Altubepekoentzat, bi bertsolari bakarrik iritsi zirelako Aramaiora eta nahiko plurienpleatuta ibili zirelako, Abarrategi gazteena ere batu zitzaien ganbararako eta kopletarako, Aramaion eskuzabalak garelako eta gure bertsolariak alokairuan jartzen ditugulako behar dutenentzat. Hain eskuzabalak izan ere, Altubepekoek eraman zutela saioko garaipena.

Ah, gogoratzen lehen aipatutako fenomeno geologikoa? Bada, nola Peru Abarrategiren inguruan zentro grabitatorio bat ezarri zen eta ardo eta zerbeza guztiak hor inguruan amaitzen zutela? Ba beno, esan dezagun fenomenoaren ondorioek nahiko galaktiko utzi zutela, bertso saioan zehar. Baina bestela, saioa ondo joan zen, gai jartzaileak bakarrik hiru aldiz eskatu behar izan zion Peruri isiltzeko eta bere taldekideek lan txukuna egin zuten. Zer da ba koadrilartekoa lagunen artean bertsotan ezin bada egin?

Amaitzeko, eskakizun txikitxo bat aterako dut plazara, ze Aramaiotik Oionera tartea dago beharbada, baina Amurriotik Aramaiorarte ere joan delako euskara. Azken finean koadrilarteko honetan denak berdintsuak gara, beraz poto guztiak doazela pikutara, guztiok gara errimen seme eta alaba, beraz merezi duen moduan zaindu dezagun Araba.

Aramaioko Bertso eskolakoen sorta:

ARAMAIXO, ARAMAIXO
BESTE INUN EZIN GITZEN JAIXO

Kurtzetatik igota
Dugu azkuaga
Mariasun eta txema
Joan ziren bertara
Abarrategi anaiak
Bertakoak gara
Beraz aramaioko
Auzo onena da

Barajuenek badauka
Auzo izaera
Sozidadean bueltan
Guztiak batera
Badaukazue hara
Joateko aukera
Berandu iritsiko
Zarete etxera

Auzorik altuenak
Izena du etxan
Oinez igo ezkero
Iritsi ta etzan
Ibili nahi baduzu
Alpinisten gisan
Egunero elurra
Egin dezake han

Kaletarrek orain ez
Hasteko liskarra
Auzoen erdigune
Omen da ibarra
Elkartzen da gende on
Eta gende txarra
Ia ia tabernak
Dituen bakarra

Gureixa azpiko landa
Mendakoko harri
Erdian Juan Ramonen
traktorea jarri
Herri osoa dago
Inbidiaz larri
Paradisu txiki bat
Baita Uribarri

Masusta bat sasiko
Arantzan gordeta
Otxandixo aurreko
Azken errebuelta
Izotza tuberien
Barruan kolpeka
Perla independente bat
Hori da Oleta