Maiatzean zehar Eskolartekoa ospatuko da Araban

2025/04/03

Udaberriro lez ekin diote ikastetxe eta bertso-eskoletan Arabako haur eta gazteek aurtengo Eskolartekoa prestatzeari. Maiatzean hasi eta ekainera bitarte izango dira adin tarte ezberdinetan eta eskualdeka banatuko da.

14 urtetik beherakoek

Hezkuntza Arautuan ikastordutan bertsolaritza lantzen duten ikasleek eta Bertso-Eskoletan (eskolaz kanpoko ekintza gisa) bertsolaritza lantzen duten ikasleek parte hartuko dute topaketa hauetan.

Bi modalitate ezberdinetan arituko dira, idatzi jasotako bertso sortak kantatuz eta bat-batean. Eskualde bakoitzean topaketa bat burutuko da. (Ikus behean topaketen data, ordutegia eta lekua.)

Idatziz jasotako bertso sortak:

3-6 lagun arteko talde txikitan idatziz jasotako bertso sortak egingo dituzte ikastetxean edota bertso-eskoletan. Maiatzaren 10era arte dute 4 kopla edo bi bertso aurkezteko aukera, ondoko gai hauetako bati erantzunez:

Urteak pasa dituzue mapa zaharrak aztertzen.Azkenean aurkitu duzue bilatzen zenuten altxorra.Nola aurkitu duzue?zein da altxorra?
Atrakzio parke erraldoia eraikitzeko aukera duzue?nolakoa izango da?
Eskolan sukaldaritza tailerra antolatuko dela esan dizuete baldintza bakarra errezeta bat bertsotan egitea. Zein izango da zuen errezeta?

Lan aukeratuen egileek beraien bertsoak jende aurrean kantatzeko aukera izango dute.

Bat-batean:

Nahi duenak banaka bat-batean aritzeko aukera izango du, ikastetxean landutako ariketaren bat izango da: 2 OINAK emanda kopla bana osatu beharko dute inprobisatuz.

Horretarako izena eman beharko du hemen: IZENA EMAN BAT-BATEAN ARITZEKO

Eskualde bakoitzean topaketa bat burutuko da, lan aukeratuen egileek beraien bertsoak jende aurrean kantatzeko aukera izango dute eta saio guztietan bat-bateko erakustaldia izango da hala izena emandako ikasleekin.

Hona hemen bat-batean zein bertso sorta aukeratuetan kantatzeko ESKUALDEZ ESKUALDEKO zitak:

GORBEIALDEA. Maiatzaren 16an, ostirala, LEGUTIOKO Kultur Etxean 18:00etan

LAUTADA. Maiatzaren 16an, ostirala, AGURAINGO HARRESI aretoan, 18:00etan

MENDIALDEA. Maiatzaren 22an, osteguna, KANPEZUKO Kultur Etxean, 18.00etan

AIARALDEA. Maiatzaren 23an, ostirala, LAUDIOKO KASINOAN, 18:00etan

ARABAR ERRIOXA. Maiatzaren 25ean, igandea, OIONGO PLAZAN , 12:00etan

GASTEIZ. Maiatzaren 24an, GASTEIZKO ZABALGANA Gizarte etxean, 11:00etan

Eskualde bakoitzetik aukeratutakoak eta bat-batekoan izena emandako haurrek Araba mailako amaiera festan kantatzeko aukera izango dute, Hontza Extrem abentura parkean irailean egun pasa bat izango dutelarik sari kolektibo moduan.

Ekainaren 7an FINALA Bitorianon, 11:00etan hasita.

12-14 urte artekoak

*Bertso-Eskoletan, hau da, eskolaz kanpoko ekintza gisa bertsolaritza lantzen duten ikasleek parte hartuko dute saio honetan. Bat-batean ariketa mota ezberdinetan trabatu direnak.

Adin tarte honetako bertso eskoletako gaztetxoek kuadrilla artekoa jokatuko dute Aramaion, maiatzaren 24an, arratsaldeko 17:00etan hasita. Eskualde eta herri ezberdinetako gaztetxoak taldean arituko dira gai jartzaileek proposatutako ariketa ezberdinetan.

14-18 urte artekoak

3 kanporaketa eta finala izango dira orotara.

Maiatzaren 15ean, osteguna

19:00etan ARAMAIOKO SASTIÑAN

Maiatzaren 10ean, ostirala
19:00etan GASTEIZKO ALDABE Gizarte Etxean

Maiatzaren 22ean, osteguna
12:00etan KANPEZUKO KULTUR ETXEAN

Kanporaketa bakoitzean sailkatutako bertsolariek finala jokatuko dute.

FINALA: Maiatzaren 24an, larunbata, ARAMAIOKO KULTUR ETXEAN 19:00etan

Txapeldunak eta txapeldun ordeak Arantzan jokatuko den Euskal Herriko Eskolarteko finalean kantatuko dute ekainaren 14an.

Eta udaberria amaitzeko Bertsoa Bizi Gazte Topaketa burutuko da, Arabako Foru Aldundiaren babesletza duen ekimena. Arabako bertsozaleen topaketa bat izango da Arantzan, ekainaren 13, 14 eta 15ean, Euskal Herriko eskolarteko txapelketako finala dela aprobetxatuz.