Ane Arexolaleiba-Amilburu eta Agirre-Najera bikoteak izan dira nagusi Bertxoko sariketako lehenengo bi kanporaketetan
Pandemia osteko etenaldi luze baten ostean bueltan da Bertxoko Sariketa. Hiru
kanporaketa eta final handi batekin ospatuko dituzte bertsozaleek Hala Bedi irratian
astero emititzen den ”Bertxoko” irratsaioaren 20. urteurrena. Jada, lehengo bi
kanporaketak jokatuta eta hirugarrena faltan, itxura hartzen ari da final handiko
partaideen kartelak. Aurten gainera, Hala Bedi irratian programa emititzen duten
“Babazorra” irratsaioko kideak izango dira 3 kanporaketetako gai-jartzaileak. Bertso
mundutik urrun egon arren euren bihurrikeriak saioetan plazaratzeko prest iritsi dira.
Lehenengo kanporaketa aurreko ostiralean jokatu zen arratsaldeko 18:30etan
Aramaioko Zabola Elkartean. Bertan honako hiru bikotek hartu zuten parte: Martin
Abarrategi-Gari Arexolaleiba, Ane Arexolaleiba-Paula Amilburu eta Xabi Antia-Iraide
Onaindia bikoteek. Lagunarteko giro epelean kategoriako saioa eskaini ziguten sei
bertsolariek, umorea eta pikea lagun entzuleen barreak ateratzeko gai izan ziren.
Ongi jakin zuten Bertxoko programan erabiltzen duten umore eta toke ganberroa
bertso saiora isladatzen. Sandwich mixto eta Serapioren rapa ariketa zailei aurre
egiteko gai izan ziren eta azkenean entzuleek erabaki behar izan zituzten irabazleen
izenak. Kontaketa estu baten ostean Ane Arexolaleibak eta Paula Amilburuk lortu
zuten finalerako lehenengo txartela.
Bigarren kanporaketa, aldiz, igande arratsaldez ospatu zen Baranbioko Garrastatxu elkartean.
Goizean Arabako Bertsolari Txapelketako aurkezpena eta elkarteko Batzar Orokorra
ospatu behar zirela aprobetxatuta babarrun jan baten ostean oholtzaratu ziren beste
lau bikote: Markel Yoller-Danel Herrarte, Hegoi Amabizka-Peru Abarrategi, Aitor
Najera-Maddi Agirre eta Txomin Abarrategi-Aitor Ugarte bikoteak. Giro gazte eta ez
horren gazteak igande arratsalderako plan aproposa eskaini ziguten zortzi
bertsolariek. Babazorra programako kideen gidaritzapean denetarik entzuteko
aukera izan genuen: Durango azokako komunetako gatazkak, Bizkaira espioitzan
joateko espedizioak, etab. Baina arratsaldeko unerik politena Serapio Lopez
bertsolari baranbioarrak eskaini zigun. Ariketetako bat Serapioren rapa imitatzea
izaten da emandako zortzi errimaz lagunduta eta publikoak hala eskatuta Serapio bera
animatu egin zen mikro aurrera atera eta erakustaldi eder bat egiteko. Azkenean,
entzuleek Maddi Agirre eta Aitor Najera bikotea aukeratu zuten finalera pasatzeko.
Beraz, kanporaketa baten faltan ia erabakita geratu da Bertxoko Sariketako final
handia. Azkeneko kanporaketa Agurainen jokatuko da ostiral honetan arratsaldeko
20:30etan Aguraingo Latsarri Gaztetxean. Bertan izango dituzue kantuan honako
bikoteak: Aroa Arrizubieta-Eukene de los Aires, Sabin Abarrategi-Unai Anda eta
Samu Rodriguez-Eli Zaldua bikoteak. Gogoratu finala urtarrilaren 26an jokatuko dela
Hala Bedi irratiko ondoko lokalean.
EGIN HEMEN BERTXOKO SARIKETAREN JARRAIPENA
