Uztailaren 3, 4 eta 5ean egingo dira Ahoa Bete Hots jardunaldiak
Aurtengo jardunaldiak hezkuntza arautuan eta ez arautuan dabiltzan irakasleei zuzenduta egongo dira bereziki. Hala, haur, lehen eta bigarren hezkuntzako irakasleak eta euskaltegietan, udalekuetan, barnetegietan, antzerkian, bertso-eskoletan eta kantua zein ipuin kontaketa erakusten dituzten irakasleentzat egokiak izango dira. Dena den, antzerki, bertsolaritza, ipuingintza eta kantugintza interesatzen zaion edonorentzat ere egokiak izango dira.
Izen-emate epea zabalik ekainaren 25era arte
Jardunaldietan izena emateko epea bihartik ekainaren 25era bitartean egongo da zabalik. Horretarako bi aukera daude. Telefonoz egin daiteke honako zenbaki honetara hots eginez: (0034) 943 693870. Eta e-mailez ere bai, helbide honetan: www.mintzola.com. Matrikularen prezioei dagokienez, matrikula arrunta 70 eurokoa izango da baina Antzerkizale, Kantuzale, Ipuin Kontalari edo Bertsozale Elkarteetako bazkideek eta Aitzondo Mankomunitateko herrietako biztanleek 45 eurotan eman ahal izango dute izena. Ikasle, langabetu eta erretiratuek, berriz, 40 eurotan. Matrikuletan beherapena dutenek egiaztagiriak aurkeztu beharko dituzte hala ere.
Ikastaroan parte hartzeagatik Euskal Herriko Unibertsitateko ikasleek kreditu bana jasoko dute.
Aurkezpeneko irudiak ikusgai dira www.bertsoa.com atarian.
Zigor Etxeburua, Iñaki Murua, Pello Añorga eta Beñat Gaztelumendi