Urriaren 2an, zirtoak eta bertsoak entzuteko hitzordua

Pello Mari Otaño beka deialdian saridun izan zen Harituz Tolosaldeko Bertsozaleen Elkarguneko hainbat kidek aurkeztutako proiektua: Aiztondoren zirtotsa. Aiztondoko zirto tradizioa eta aplikazio didaktikoa. Mintzola Ahozko Lantegiak eta Kilometroak ekimenak antolatu zuten beka deialdia, Amasa-Villabonako eta Zizurkilgo Zubimusu Ikastolaren eta Zizurkilgo Hernandorena Kultur Elkartearen laguntzarekin.

Urriaren 2an, proposamena aurkeztuko dute Harituzekoek, beka deitutako antolatzaileak ere bertan direla. 18:00etan izango da hori, Zizurkilgo Herrigunean dagoen Iriarte kultur etxean.

Segidan, Kilometroek antolatuta, bertso saioa izango da Zizurkilgo Intxaur frontoian: Amets Arzallus, Anjel Mari Peñagarikano, Haritz Mujika, Maialen Lujanbio eta Oihana Iguaran ariko dira bertsotan, eta Amaia Agirre izango da saioaren gidaria eta gai jartzailea. 19:00etan hasiko da.

Saiorako sarrerak eskuragai daude www.kilometroak.eus webgunean.