Kalean da apirileko Bertsozalea

Martxoaren 7an egindako Euskal Herriko Bertsozale Elkartearen Batzar Nagusiak hartu du ale honetako azala. 61 bazkide hurbildu ziren Senperera proiektuaren nondik norakoak ezagutzera. Datozen egitasmoei dagokionez, Gipuzkoako txapelketan jarriko dira orain indarrak, Araba eta Nafarroakoa atzean utzita. Udarako ere bada eskaintza, eta EHUko udako ikastaroen baitan Bertsoa Unibertsitatean bost eguneko eskola antolatuko da, baita Aho Bete Hots jardunaldiak ere. Gaztetxoek ere izango dute bertsolaritzaz gozatzeko aukera, elkarteak antolatu dituen bertso-udalekuei esker.

Bertso-udalekuena, ordea, ez da gazteentzat prestatutako egitasmo bakarra, Bizkaiko Bertsozale Elkarteak zein Bertsularien Lagunak elkarteak bertso topaketak prestatu baitituzte apirilaren erdialdean hasita. Apirilaren 26an ere Gipuzkoako Bertso Eskolen Eguna ospatuko da Irunen, eta horren ingurukoak ere biltzen dira hilabete honetako Bertsozalean.