Jaso al duzu urriko BertsoZalea?

28.000 ikasle baino gehiagok jasoko dute aurten bertsolaritzaren berri beren ikasgeletan, Bertsozale Elkarteko 50 irakasleren bitartez eta elkarteak berak prestatutako baliabideei esker; besteak beste, iaz aurkeztu zen bertsoikasgela.eus webgunea. Gainera, urteurrenean atari berria aurkeztu dugu: kasu honetan, bertso-eskolentzako webgunea da prestatutakoa, eta hark hartu du urriko berripaperaren azala: bertsoeskola.eus.

Gaitegia, doinutegia, errimategia eta beste hainbat atal ditu webguneak, eta horien berri dakar 207. BertsoZaleak. Hala ere, onena bertara sartzea eta arakatzea!

Eta bertso-eskolaz ari garela, ezin ahaztu Bizkaiko Bertsozale Elkartetik antolatu dugun Sakontze Bertso Eskola; Gizonezkoen Bertso Eskola Feministaren eta Ahalduntze Bertso Eskolarekin batera, hasi dugun ikasturteko eskaintza osatuko du, Bertsozale Elkartetik sustatuko bertso-eskola berezituei dagokionez: ahotsaren mugak, librean egiteko zailtasunak, umorea...horiek izango dira, besteak beste, landuko diren gaiak, Onintza Enbeita gidari dela.

Gazteentzako saio sortak dira Ahostegunak egitasmokoak ere; bertsolaritzaz harago, antzerkia, kantua eta literatura izango dituzte mami saio hauetan. Mintzola Ahozko Lantegiak eta UPV/EHUko Mikel Laboa Katedrak antolatuta, hainbat gazte elkartuko dira ostegunero.

Eta adin guztietako zaleentzako aproposa den Bertsoaroaren eskaintza zehatz-mehatz ezagutaraziko dugu laster; egunen aurrerapena, BertsoZalean.

Horiek guztiak eta Potofinixa, Jon Barberenari bertsoa Julio Sotok, Maite Berriozabalen puntua Alaitz Rekondori... 207. zenbakian, BertsoZalean.