Hitzetik Hortzera, ‘hitz esanetan’
Eider Adeletx eta Ane Zubeldia poesiazaleak, poetak eta Mejillon Tigre kolektiboko kideak dira. 2022an Hitz Hibridoak bekari esker sortu zuten Hitz esana poesia errezitaldia eta, hiru urteko ibilbidearen ondoren, maiatzean amaituko dute bira. Errezitaldiaren ibilbideari buruz hitz egiteko elkartuko dira aste honetako gonbidatuak Mirari Martiarenarekin.
Hitz esana emanaldia definitzeko kontzeptu desberdinak erabili diren arren, spoken word-a da egiten dutena Eider Adeletx eta Ane Zubeldiak. Zuzenean emateko egina den poesia molde honetan eroso sentitu, eta egin nahi zuten hori nola lortu duten kontatuko digute; gainera, poemak sortzeko prozesua, zeri buruz idatzi, nola gorpuztu eta oholtzaratu ere izango ditugu hizketagai.
Spoken word-ak edo Hitz esanak bertsolaritzarekin dituen antzekotasunei buruz ere arituko gara; baita, Mejillon Tigreren emanaldi batean inprobisazioak duen tokiaz eta behin bira amaituta hartuko duten bideaz edo egin nahiko luketenaz ere.
Iruñeko eta Oiartzungo bertsoaldiak
Bertsoaldiek ere izango dute tartea aste honetako programan, beti bezala. Alde batetik, Iruñeko Zabalgune auzoko bertso afaria ekarriko dugu pantailara. Garazi San Martinek egin zituen gai-jartzaile lanak eta Saioa Alkaiza eta Sustrai Colina aritu ziren bertsotan.
Beste alde batetik, Oiartzunen egin zen PUF bertso-saio musikatua ikusiko dugu, Literaturan plaz(a/e)ra ekimenaren baitan egin zena. Bertsotan egin zuten Alaia Martin, Amets Arzallus eta Miren Artetxek, gai-jartzen Ainhoa Urien aritu zen, eta Bastien Marianne eta Patxi Amulet musikariek jarri zituzten bertso doinuak.
Hitzetik Hortzera: larunbatean, 21:00etan, ETB1en.
