Aurkeztu da aurtengo ikasturteko Bertsotruk
Portugaleten aurkeztu zen Bertsotruk ekimenaren bigarren edizioa eta han izan ziren bertso eskola parte-hartzaileak. 27 talde osatu dituzte bertso-eskolek eta hauek 3 taldeko 9 multzotan ariko dira:
- Bilbo - Bortziriak - Urretxu/Zumarraga
- Debagoiena - Larrabetzu/Mungia - Lasarte-Oria
- ALBE - Irun - Zarautz
- Barañain - Gernika-Lumo - Oñati
- Erniarraitz - Durangaldea - Gasteiz
- Aramaio - Goierri - Orio
- Hernani - Markina-Xemein - Sakana
- Aiaraldea - IEH (Ipar Euskal Herria) - Leitza/Lekunberri
- Enkarterri - Harituz - Iruñea
Iazko formatuari jarraituz, bertso eskola bakoitzak bere multzoko beste biak hartuko ditu etxean, eta era berean, beste bi bertso eskolek antolatutako ekitaldira joango da. Emanaldia edozein motatakoa izan daiteke: bertso-saio formala, bertso-bazkaria, bertso-antzerkia...
Bertso eskolen arteko harremanak sustatu asmoz, iaz jarri ziren martxan bertso eskolen arteko desafioak Euskal Herriko Helduen Bertso Eskolen Batzordearen eskutik, eta balorazio ona izan zuen ekimenak: 30 saio egin ziren Euskal Herriko hainbat txokotan.
Bertsoan jarraitu ahal izango dira norgehiagoken nondik norakoak eta Xenpelar Dokumentazio Zentroak osatutako Bertsolaritzaren Datu Basean topatuko duzue hitzorduen agenda.
Larunbatean, Portugaleten bildu ziren bertso eskola parte hartzaileak / XDZ