Adin-adin ekimena igandeko Hitzetik Hortzeran

“Adin-adin” proiektua duela 4 urte jarri zen martxan Lanku Kultur Zerbitzuak enpresaren eta Gipuzkoako Foru Aldundiaren elkarlanari esker. Bertsolaritza adinekoen egoitzetara iristaraztea du helburu, honek nagusien bizi kalitatea eta gaitasunak hobetu ditzakeelako. Gipuzkoako 14 egoitza daude proiektuan sartuta, eta beste probintzietara ere zabaltzen ari da pixkanaka. 

 

Egoitzetan “Adin-adin” proiektua nola bizi duten ezagutzeko, Agustin Jimenezekin elkartuko gara. Bera Zorroagako eragilea da. Ane Labaka bertsolariak “Adin-adin” proiektuaz bertso-jarri batzuk kantatuko dizkigu eta gaiari buruz galdetuko diogu. Agustin Jimenezen gidaritzapean bertso-saioa egin zuten Ane Labaka eta Andoni Egañak Zorroagako egoitzan eta bertako bertsoaldiak entzungo ditugu. 

 

 

Elgoibarren bertso jaialdia antolatu dute abenduaren 27an herriko antzokian eta bertatik bertsoaldi onenak ekarriko ditugu. Kantuan ariko dira Miren Artetxe, Andoni Egaña, Nerea Ibarzabal, Unai Iturriaga eta Maialen Lujanbio. Gai-jartzaile lanak Uxue Alberdik egingo ditu. Hernaniko Sandiusterri egoitzan ere bertso jaialdia izango da, abenduaren 29an. Bertsotan izango dira Miren Artetxe, Beñat Gaztelumendi, Beñat Iguaran, Oier Iurramendi, Agin Laburu eta Maialen Lujanbio. Gai-jartzaile lanak Aritz Zerainek egingo ditu. 

Hori dena igandean arratsaldeko 15:00etan Euskal Telebistako lehen katean. Eta zuzenean ikusi ezin duenak Internetez ere izango du aukera EITBren Nahieran orrian.