XILABA 2021
Bi urtez segidan taldeka nabigatu ondotik, berriz ere, bakarka nabigatzen ari ziren iazko larrazkenean Xilabako bertsulariak. Zipriztin txikiek ekarri zuten tsunamiak haren marka utzi zuen eta hortik hogeita lau bertsulari bizirik atera dira. Bakoitza bere ontzi eta bere bela-oihalarekin, aldeko haizea baliatu nahirik.
Baina bakarkako Xilaban, bakoitza bere aldetik doala badirudi ere, denek osatzen dute ontzi zabal eta bakar bat, bertsuaren ontzi zaharberritua. Eta denak doaz itsaso beraren gainean, euskararen itsasoan.
Elkarteko langile eta bazkide, bertsu eskoletako irakasle eta ikasle, bertsu plazetako antolatzaile eta bertsuzale, denak goaz ontzi berean, errimak arraun eta neurriak oihal, gure hizkuntzaren ipar orratza eskuetan harturik.
Eta goazen bitartean, kantari goaz, bertsu kantari. Bertsu bakoitzean zabaltzen delako ontzia eta berritzen itsasoa.
AURTEN ERE MEMENTO ORO INDARREAN IZANEN DIREN OSASUN ARAUDIAK JARRAITU BEHARKO DITUGU.