Gaur izango dira lehenbiziko hiru finalaurrekoak, Irurtzunen, Tafallan eta Iruñean
Gaur abiatuko da 2024ko Bardoetako finalaurrekoen fasea. Lehen fasetik sei talde pasa dira finalaurrekoetara: Barañain-Atarrabiako 'Argako Bixiguak’, Bortziriak-Baztango ‘Mutilatuak’, Leitza-Altsasu-Barañaingo ‘Manteleko sobrak’, Baztango ‘Baztanzopak’, Bortzirietako 'Hor gu!' eta Iruñerriko 'EzKrashak'. Sei talde horiek hirunaka antolatu dira, joan-itzuliko bi kanporaketetan. Guztira, beraz, sei saio izango dira finalaurrekoetan, joaneko hiru, eta itzuliko beste hiru. Horietan zehaztuko dira aurtengo hiru finalistak.
Gaur, urriak 4, jokatuko dira, hain zuzen ere, joaneko lehen hiru saioak, Irurtzunen, Tafallan eta Iruñean. Lehenengoan, Argako Bixiguak eta Mutilatuak taldeak izango dira aurrez aurre. Pikuxar Elkartean izango da saioa, 18:30ean hasita. Bost euroko sarrera izango du saioak, eta otordua eskainiko da bukatutakoan.
Tafallan 19:00etan hasiko da finalaurrekoetako saioa. Aguazon Peñan izango da ekitaldia, eta han izango dira kantuan Manteleko sobrak eta Baztanzopak taldeak, finalerako txartel bila. Hiru eurokoa da sarrera.
Iruñeko saioa 20:00etan izango da Aldapa Peñan. Bertan izango dira lehian Hor gu! Eta EzKrashak taldeak. Sarrera librea izango du saioak, baina egongo da borondatea uzteko aukera. Bukatutakoan otordua eskainiko da baita.
Saio hauetan bildutako puntuei, itzulerako saioetako eskuratzen dituztenak gehitu beharko dizkiete taldeek. Joan-itzuliko kanporaketa bakoitzean puntu gehien eskuratzen duen taldea izango da finalerako sailkatzen dena. Hortaz, hiru talde izango dira urriaren 26an Garesen jokatuko den finalean. Sarrerak eskuragarri daude dagoeneko, www.bertsosarrerak.eus atarian.
