Irungo saioa zuzenean emitituko dugu

2024/10/25

Bertsoa.eus atarian egongo da ikusgai saioa. Ohi biano edukiera txikiagoko aretoa da Irungoa: hortik zuzenean emititzeko erabakia.

Irungo saioa, igande honetan, urriaren 27an, Bertsoa.eus atarian ikusgai egongo da, zuzenean. Saioko sarrerak agortuta daude, eta jende ugari geratu da saiora sartu ezinda. Ez da txapelketan horrelakorik gertatu den lehen aldia, baina Irungo egoera berezia da: final-laurden bati dagokiona baino edukiera txikiagoa du aretoak.

Hori horrela, Gipuzkoako Bertsozale Elkartetik erabaki dugu zuzenean emititzea: zuzenean emango dugun final-laurden bakarra da, aipatutako edukieragatik ohi baino jende gutxiagoak izango baitu saioa jarraitzeko aukera. Bertsoa.eus webgunean egongo da zuzeneko emanaldia jarraitzeko aukera.

Bestalde, ohi legez, webgune honetan aurkituko duzue saioari buruzko informazio osoa; baita puntuazio orokorra eta ariketaz ariketakoa ere, saioa bukatu eta segituan.